စစ်အစိုးရ ကြေညာချက် နာဂ NLD ကန့်ကွက်
ဇာနည်မာန် August 24 ဧရာဝတီ
စစ်အစိုးရ ထုတ်ပြန် ကြေညာခဲ့သော စစ်ကိုင်းတိုင်းရှိ မြို့နယ် ၃ မြို့နယ်ကို နာဂဒေသ ကိုယ်ပိုင် အုပ်ချုပ်ခွင့်ရ ဒေသ သတ်မှတ်ခြင်းနှင့် ပတ်သက်၍ နာဂအမျိုးသား ဒီမိုကရေစီအဖွဲ့ချုပ် (NLD) က ကန့်ကွက် လိုက်သည်ဟု သိရသည်။
စစ်ကိုင်းတိုင်းအတွင်းရှိ လေရှီးမြို့နယ်၊ လဟယ်မြို့နယ်နှင့် နန်းယွန်းမြို့နယ်တို့ကို နာဂကိုယ်ပိုင်အုပ်ချုပ်ခွင့်ရ ဒေသအဖြစ် သတ်မှတ်ရာတွင် နာဂလူမျိုးများ ရွေးချယ်ထားသည့် ကိုယ်စားလှယ်များနှင့် ဆွေးနွေးညှိနှိုင်း ခြင်းမရှိဘဲ စစ်အစိုးရ လက်အောက်တွင် အကန့်အသတ်ဖြင့်သာ နေထိုင်ရမည် ဖြစ်သောကြောင့် ကန့်ကွက် ရခြင်းဖြစ်သည်ဟု နာဂအမျိုးသား ဒီမိုကရေစီအဖွဲ့ချုပ် ဥက္ကဋ္ဌ ဦးစောဆ က ဆိုသည်။
"သူတို့ခွဲတာမှာ နာဂအများစုရှိတဲ့ နယ်မြေတွေလည်း မပါဘူး။ သူတို့ သတ်မှတ်တဲ့နေရာတွေက နာဂ တိုင်းရင်းသားတွေရဲ့ သြဇာသက်ရောက်မှု ဘာမှမရှိတဲ့နေရာတွေ။ ဒီကိစ္စမှာလည်း နာဂတိုင်းရင်းသား ခေါင်းဆောင်တွေက ဘာမှ မသိကြရဘူး။ ကိုယ်ပိုင်အုပ်ချုပ်ခွင့် ရတယ်လို့ ပြောပေမယ့် တကယ်တမ်းကျရင် ဘာမှ ထူးခြားမှုမရှိနိုင်ဘူး" ဟု ဦးစောဆက ပြောသည်။
စစ်အစိုးရက နာဂ အပါအ၀င်၊ ၀၊ ကိုးကန့်၊ ပအို့ဝ်နှင့် ပလောင် ကိုယ်ပိုင်အုပ်ချုပ်ခွင့်ရ တိုင်း၊ ကိုယ်ပိုင်အုပ်ချုပ်ခွင့်ရ ဒေသ များနှင့် ရုံးစိုက်ရာမြို့များ သတ်မှတ်ခြင်းကို သြဂုတ် ၂၀ ရက်နေ့က ထုတ်ပြန်ခဲ့သည်။
ယခုကဲ့သို့ သတ်မှတ်ပေးခြင်းသည် တိုင်းရင်းသားများက ကိုယ်ပိုင်အုပ်ချုပ်ခွင့်ရ ဒေသများ တောင်းဆိုခဲ့ကြသည်ကို စစ်အစိုးရအနေဖြင့် လိုက်လျောသည်ဟု ထင်မှတ်စရာ ရှိသော်လည်း လက်တွေ့တွင်မူ အပေါ်ယံ ဟန်ပြမျှသာ ဖြစ်သည်ဟု ဦးစောဆ က ဆိုသည်။
သူက "သူတို့ပေးတဲ့ ကိုယ်ပိုင်အုပ်ချုပ်ရေး ဆိုတာက စစ်အစိုးရရဲ့ ဗဟိုအဖွဲ့ကနေ လူတွေရွေးပြီး အုပ်ချုပ်ဖို့ ခန့်ထားတာ။ ကျနော်တို့ တိုင်းရင်းသားတွေ တောင်းဆိုခဲ့ကြတဲ့ ဖယ်ဒရယ်ပြည်ထောင်စုကို လုပ်ပေးလိုက်တာ မဟုတ်ဘူး။ ကိုယ့်တိုင်းရင်းသား ထဲက သဘောတူညီမှုနဲ့ ရွေးထားတဲ့သူ တယောက်မှ မပါဘူး။ နောက် နာဂ နယ်မြေက သမိုင်းဝင် နယ်နိမိတ် ရှိပြီးသား။ ဒီမြို့နယ် ၃ ခုတည်း ရှိတာ မဟုတ်ဘူး" ဟု ပြောသည်။
နာဂတိုင်းရင်းသား အများစုနေထိုင်ကြသည့် ဒေသများမှာ စစ်ကိုင်းတိုင်း မြောက်ပိုင်းရှိ တမူး၊ မော်လိုက်၊ ဖောင်းပြင်၊ ဟုမ္မလင်း၊ လေရှီး၊ လဟယ်၊ ခန္တီး၊ နန်းယွန်းနှင့် တနိုင်းမြို့နယ်တို့ ဖြစ်သည်။
နာဂတောင်တန်းဒေသသည် လမ်းပန်းဆက်သွယ်ရေး ခက်ခဲသဖြင့် စီးပွားရေး၊ ပညာရေး၊ လူမှုရေး ဖွံ့ဖြိုးတိုးတက်မှု နှောင့်နှေးလျှက်ရှိရာ အိမ်နီးချင်း အိန္ဒိယနိုင်ငံသို့ ပညာသင်ရန်နှင့် အလုပ်လုပ်ကိုင်ရန် ရွှေ့ပြောင်းနေထိုင်ကြသော နာဂ တိုင်းရင်းသားများလည်း ရှိနေသည်။
ထိုသို့ ရောက်ရှိနေသော နာဂ များကို မြန်မာအာဏာပိုင်များက လာမည့်ရွေးကောက်ပွဲတွင် ပြန်လာ၍ မဲပေးရမည်ဟု ဖိအားပေး ပြောဆိုခြင်းများ ပြုနေကြောင်း သိရသည်။
လေရှီးဒေသမှ အိန္ဒိယသို့ ပညာသင်လာသည့် နာဂအမျိုးသားတဦးက "အိမ်ကိုလာပြီး ကျနော့်ကို ပြန်လာမဲပေးရမယ်ဆိုပြီး အမေ့ကို ပြောတယ်တဲ့။ မပြန်ရင် အိမ်ကို လယ်ကိုသိမ်းမယ်ပြောတယ်။ ကျနော်က ဒီမှာ ကျောင်းတက်နေတာဆိုတော့ ဘယ်လိုပြန်ရမလဲနော်။ မပြန်ရင်လည်း အိမ်၊ လယ် သိမ်းမှာစိုးတာပေါ့။ မဲကတော့ မပေးချင်ပါဘူး။ ကျနော်တို့အတွက် ဘာမှ အကျိုးမရှိဘူးလေ" ဟု ပြောပြသည်။
ထိုသို့ ခြိမ်းခြောက်ခေါ်ယူမှုများကြောင့် နေရပ်သို့ ခေတ္တ ပြန်လိုသူ နာဂတိုင်းရင်းသားများလည်း ရှိနေပြီး ခြိမ်းခြောက်မှုများမှာ ရွေးကောက်ပွဲကာလအတွင်း ယာယီသာဖြစ်၍ တစုံတရာ အကျိုးသက်ရောက်မှု မရှိနိုင်ဟု ထင်မြင်သုံးသပ် သူများလည်း ရှိကြောင်း သူက ဆိုသည်။
စစ်အစိုးရက လာမည့် နိုဝင်ဘာ ၇ ရက်နေ့တွင် ရွေးကောက်ပွဲပြုလုပ်ရန် တရားဝင်ကြေညာထားသည်။
ဦးစောဆ က "စစ်အစိုးရ ကျင်းပမယ့် ရွေးကောက်ပွဲဟာ ပြည်သူရဲ့ဆန္ဒလည်း ဘာမှမပါဘူး။ ပြည်သူတွေကို အမှန်တကယ် ကိုယ်စားပြုတဲ့သူတွေလည်း မပါဘူး။ တဖက်သတ်ကျတဲ့အပြင် စစ်အစိုးရက ပြည်သူတွေကို ခြိမ်းခြောက်တာတွေလုပ်ပြီး သူ့ရဲ့ ကြံ့ဖွံ့ပါတီကိုပဲ အနိုင်ရအောင် လုပ်ထားတာဖြစ်လို့ အမျိုးသားဒီမိုကရေစီ အဖွဲ့ချုပ်က ဆန့်ကျင်တာကို ကျနော်တို့က ထောက်ခံတယ်။ ပြည်သူအားလုံးကလည်း ၀ိုင်းဆန့်ကျင်ကြဖို့ လိုတယ်" ဟု ပြောသည်။
No comments:
Post a Comment